गण्डकी । सांस्कृतिक जगेर्नासहित पर्यावरणीय संरक्षण र पर्यटन प्रवद्र्धनका लागि कास्कीको अन्नपूर्ण गाउँपालिका–११ छोम्रोङमा ‘२१औँ सेञ्चुरी ल्होसार मेला’ हुने भएको छ । तमु समुदायको पर्व ल्होसारको अवसरमा आगामी पुस १० गतेदेखि १४ गतेसम्म मेला गर्न लागिएको सेञ्चुरी युवा क्लबका अध्यक्ष मिकास गुरुङले जानकारी दिए । विगत लामो समयदेखि ल्होसार मेला गर्दै आइएको बताउँदै उनले मेलाले यस क्षेत्रको पर्यटन प्रवद्र्धनमा महत्वपूर्ण टेवा पुग्ने विश्वास व्यक्त गरे ।
मेलामा भलिबल, बास्केटबल, थ्री अन थ्री बास्केटब, छेलो हान्ने, रस्साकस्सी, घैटो फुटाउने, म्युजिकल चियरलगायत प्रतियोगिता समावेश गरिएको उहाँले जानकारी दिनुभयो । प्रतियोगिताअन्तर्गत पुरुष भलिबल तथा बास्केटबल विजेता टिमलाई रु ५० हजार नगदसहित ट्रफी, मेडल र प्रमाणपत्र प्रदान गरिनेछ ।
त्यस्तै दोस्रो र तेस्रो हुने टिमले क्रमशः ३० हजार र १८ हजारसहित ट्रफी, मेडल र प्रमाणपत्र प्राप्त गर्ने जनाइएको छ । ‘थ्री अन थ्री’ पुरुष बास्केटबलतर्फ विजेताको टिमले २५ हजार नगदसहित ट्रफी, मेडल र प्रमाणपत्र र द्वितीय हुनेले १५ हजार नगदसहित ट्रफी, मेडल र प्रमाणपत्र पाउने अध्यक्ष गुरुङले बताए ।
भलिबल र बास्केटबलको लागि रु पाँच हजार र ‘थ्री अन थ्री’ पुरुष बास्केटबलको लागि रु तीन हजार दर्ता शुल्क तोकिएको छ । मेलालाई थप आकर्षक बनाउन विभिन्न साँस्कृतिक कार्यक्रमसहित अन्नपूर्ण व्याण्डले लाइभ कन्सर्ट गर्ने आयोजकले जनाएको छ । अन्नपूर्ण आधार शिविरको पदमार्गमा पर्ने छोम्रोङ यस क्षेत्रको आकर्षक पर्यटकीय गन्तव्य हो ।
