राष्ट्रपति भ्लादिमिर पुटिनले रुसले सैन्य क्षमता थप विकास गर्ने बताएका छन् । युक्रेनमा लडाइँ जारी रहेका बेला पुटिनले आफ्नो सैनिक तयारीलाई थप बढावा दिने प्रतिबद्धता पनि व्यक्त गरेका छन् ।
‘हाम्रा सेनाको लडाइँ क्षमताहरू निरन्तर बढ्दै गएको छ । यो प्रक्रिया थप तीव्र गतिमा बढ्दै जाने छ, त्यो वातावरण हामी निर्माण गर्नेछौं’ पुटिनले आफ्नो देशका उच्चपदाधिकारीहरूसँग गरेको बैठकमा भनेका छन् ।
‘आज, हाम्रो लक्ष्य सशस्त्र सेनाको गुणात्मक नवीकरण र सुधार प्राप्त गर्न आवश्यक उपायहरूको सम्पूर्ण दायरा कार्यान्वयन गर्नु हो’ पुटिनले रुसी रक्षा मन्त्रालयको विस्तारित बोर्ड बैठकमा भने ।
उनले सेनालाई आणविक लडाइँका लागि तम्तयार अवस्थामा राख्न र थप सुधार गर्न आग्रह गरेका छन् । मुलुकको सार्वभौमसत्ता, क्षेत्रीय अखण्डता, रणनीतिक समानता र विश्वमा सेनाको सामान्य सन्तुलन सुरक्षाको ग्यारेन्टी गर्नका निम्ति यो कदम आवश्यक रहेको पुटिनको धारणा छ ।
उनले नयाँ जिरकोन हाइपरसोनिक क्रुज मिसाइलको विकासमा जोड दिँदै रूसी सेना जनवरीसम्म यसको प्रयोग गर्न सक्षम हुने बताए ।
राष्ट्रपति पुटिनले जनवरीको सुरुमा एडमिरल गोर्शकोभ नामक नौसैनिक युद्धपोत (फ्रिगेट) लाई नयाँ जिरकोन हाइपरसोनिक मिसाइलले सुसज्जित गरिने र त्यसबराबरको शक्तिशाली अर्को हतियार संसारमा नभएको दाबी गरेका छन् ।
उनले रुसको रणनीतिक आणविक शक्तिमा आधुनिक हतियारको स्तर ९१ प्रतिशत नाघेको र रणनीतिक शक्तिलाई अत्याधुनिक हतियार प्रणालीले सुसज्जित बनाउने थप प्रतिबद्धता पनि व्यक्त गरेका छन् ।
राष्ट्रपति पुटिनले आधुनिक वायु सुरक्षाले ढाकिएको क्षेत्रमा सञ्चालित लडाकु र बमवर्षकहरूको सङ्ख्या बढाउने पनि उल्लेख गरेका छन् ।
बैठकमा प्रतिवेदन प्रस्तुत गर्दै रक्षामन्त्री सर्गेई शोइगुले रुसी सेनामा सैनिकको सङ्ख्या ६ लाख ९५ हजार बढाएर १५ लाख पु¥याउने प्रस्तावसमेत गरेका छन् ।
उनले युक्रेनमा रहेका रुसी सैनिकहरूले त्यहाँ ‘पश्चिमका संयुक्त सेना’ सँग लडिरहेको पनि टिप्पणी गरे ।
मन्त्री शोइगुले रुसले जारी आक्रमणको क्रममा एजोभ सागरमा रुसी सैनिकको कब्जामा रहेका दुई युक्रेनी बन्दरगाह शहरहरू प्रयोग गर्ने योजना बनाएको पनि बताएका छन् ।
