हेटौँडा । हेटौँडा उपमहानगरपालिकाले गत आर्थिक वर्ष २०७८÷७९ मा विनियोजित रकमको ७५ प्रतिशत मात्र खर्च गरेको छ । उपमहानगरपालिकाको कुल रु दुई अर्ब ९१ करोड ९३ लाख बजेट रहेकामा रु दुई अर्ब २० करोड ५२ लाख खर्च भएको छ ।
गत आर्थिक वर्षमा सो पालिकाको रु एक अर्ब ३० करोड १७ लाख बजेट रहेकामा रु एक अर्ब ३० करोड १७ लाख मात्र खर्च गरेको उपमहानगरपालिकाले जनाएको छ । त्यस्तै पूँजीगततर्फ रु एक अर्ब ६१ करोड १५ लाख बजेट रहेकामा रु एक अर्ब आठ करोड ३७ लाख खर्च भएको छ ।
हेटाँैडा उपमहानगरपालिकाले आव २०७८÷७९ मा आन्तरिकतर्फ रु २८ करोड ४२ लाख ८२ हजार राजस्व सङ्कलन गरेको छ । विभिन्न सिफारिश दस्तुरवापत रु दुई करोड ८८ लाख र नक्सापास दस्तुरवापत रु दुई करोड ३७ लाख र व्यवसाय करवापत रु एक करोड ७९ लाख ४४ हजार राजस्व सङ्कलन गरेको छ । साथै १९ वडाबाट रु पाँच करोड ३२ लाख राजस्व सङ्कलन तथा नदीजन्य पदार्थको बिक्रीबाट रु चार करोड ३० लाख राजस्व सङ्कलन गरेको छ ।
हालसम्म उपमहानगरपालिकाले आवको अन्त्यसम्ममा २५ ऐन, चार नियमावली, २९ कार्यविधि र १४ निर्देशिका तयार गरिसकेको जनाएको छ । समाज कल्याण शाखाअन्तर्गत ४५.५८ प्रतिशत वित्तीय प्रगति भएको छ । यसका लागि रु एक करोड २१ लाख बजेट विनियोजन भएकामा रु ५५ लाख ३८ हजारमात्र खर्च भएको छ ।
नगरप्रमुख मीनाकुमारी लामाले उपमहानगरपालिकाको कामलाई प्रभावकारी बनाइने र जनताको कामलाई सरल तथा सहज बनाउनेतर्फ सबैले जोड दिनुपर्ने बताए ।
