धनुषा । मधेस प्रदेशसभामा यसपटक केही पुराना र केही नयाँ अनुहारलाई जनताले जनप्रतिनिधिका रुपमा पठाएका छन् । फरक दल, फरक समुदाय, फरक उमेर र फरक वर्गको प्रतिनिधित्व मधेस प्रदेशसभामा देखिने भएको छ ।
प्रदेशसभामा प्रत्यक्ष निर्वाचित ६४ जना र समानुपातिक ४३ जना गरी जम्मा एक सय ७ सदस्यीय सांसद चुनिने व्यवस्था रहेको छ । अघिल्लो निर्वाचनमा चुनिएका कतिपय सांसद यसपटक पुनःदोहोरिएका छन् भने संसद्को पहिलो अनुभव लिन नयाँ अनुहारको समेत उल्लेख्य संख्यामा प्रदेशसभामा प्रवेश पाउने भएको छ ।
एक कार्यकाल मुख्यमन्त्रीका रुपमा सरकार सञ्चालन गरी सकेको लालबाबु राउत फेरि दोहोरिएका छन् । जनता समाजवादी पार्टी (जसपा)का केन्द्रीय नेतासमेत रहेका उनी पर्सा क्षेत्र नं १ (२)बाट निर्वाचित भएका छन् ।
कांग्रेस नेता रामसरोज यादव धनुषा क्षेत्र नं ३ (१)बाट फेरि प्रदेशसभा सदस्यमा निर्वाचित भएका छन् । रामसरोज यसअघि भौतिक पूर्वाधार तथा यातायातमन्त्रीसमेत भइसकेका छन् ।
लोकतान्त्रिक समाजवादी पार्टी (लोसपा) नेता जितेन्द्र सोनल पनि बारा क्षेत्र नं ४ (२) बाट दोस्रो पटक निर्वाचित भएका छन् । सोनल मधेस प्रदेशमा भौतिक पूर्वाधार तथा विकासमन्त्री भइसकेका छन् ।
त्यस्तै पर्सा क्षेत्र नं २ (२) बाट लोसपाकै रमेशप्रसाद कुर्मी पनि फेरि निर्वाचित भएका छन् । उनी २०७४ को निर्वाचनमा तत्कालीन राजपाबाट निर्वाचित भएका थिए । पर्साकै क्षेत्र नं ४ (१)बाट कांग्रेसका शङ्करप्रसाद चौधरी पनि दोस्रोपटक प्रदेशसभा सदस्यमा निर्वाचित भएका छन् । दोस्रो पटक निर्वाचित हुनेमा रौतहट–४ (२) बाट जसपाका शेष अबुल कलाम आजाद पनि परेका छन् ।
यसैगरी सर्लाहीबाट चार जना प्रदेश सांसद दोस्रो पटक निर्वाचित भएका छन् । सर्लाही क्षेत्र नं १ (१)बाट लोसपाका उपेन्द्र महतो र (२) बाट वेंची लुङेली, क्षेत्र नं ३ (२)बाट जसपाका सञ्जयकुमार यादव तथा क्षेत्र नं ४ (१) बाट कांग्रेसका वीरेन्द्रप्रसाद सिंहले प्रदेशसभामा पुनः निर्वाचित भई सिट सुरक्षित गरेका छन् । कांग्रेसका सिंह यसअघि प्रदेशको महिला, बालबालिका, युवा तथा खेलकुद मन्त्री भएका थिए ।
त्यस्तै महोत्तरी क्षेत्र नं ३ (१) मा लोसपाबाट उम्मेदवार बन्नुभएका अभिराम शर्मा र ३ (२) बाट रानी शर्मा पुनःनिर्वाचित भएका छन् । अभिराम शर्माले सामाजिक विकास राज्यमन्त्रीको समेत जिम्मेवारी सम्हाली सकेका छन् ।
उनले मधेस प्रदेश सरकारका मुख्य न्यायाधिवक्ताबाट राजीनामा दिएर चुनावी मैदानमा उत्रिएका जसपाका दीपेन्द्र झालाई झिनो मतले पराजित गरेका हुन् । धनुषा क्षेत्र नं २ (२)मा जसपाका रामाशिष यादव पनि दोस्रो पटक प्रदेशसभा सदस्यमा निर्वाचित भएका छन् । सप्तरी क्षेत्र नं ३ (१) मा कांग्रेसका मोहम्मद समिम पनि दोस्रो पटक निर्वाचित भएका छन् ।
केही नयाँ अनुहार
पर्सा क्षेत्र नं १ (१)बाट निर्वाचित माओवादी केन्द्रका रहवर अन्सारी, पर्सा क्षेत्र नं २ (१) बाट निर्वाचित कांग्रेसका श्यामप्रसाद पटेल, पर्सा क्षेत्र नं ३ (२) बाट जितेका कांग्रेसका जनार्दन सिंह क्षेत्रीको प्रदेशसभामा यो पहिलो यात्रा हो । यस्तै बारा क्षेत्र नं ३ (१)बाट निर्वाचित एमालेको रवीन्द्र दास श्रेष्ठ, बाराकै क्षेत्र नं ४ (१)बाट निर्वाचित एमालेका देवनारायण थारू पनि प्रदेशसभाका लागि नयाँ हुन् ।
रौतहटमा प्रदेशसभामा निर्वाचित सातमध्ये ६ नयाँ रहेका छन् । क्षेत्र नं १ (१) बाट नागेन्द्र साह र (२) बाट कृष्णप्रसाद यादव निर्वाचित निर्वाचित भएका छन् । कांग्रेसका दुवै नेताको पनि यो प्रदेशसभाको पहिलो यात्रा हो ।
कृष्ण यादव कांग्रेसका प्रदेश सभापति हुन् । क्षेत्र नं २ (१)मा एमालेका मोहम्मद जैद आलम, क्षेत्र नं २ (२) बाट निर्वाचित कनिश पटेल, क्षेत्र नं ३ (१) मा स्वतन्त्र उम्मेदवार केशव राय र क्षेत्र नं ४ (१) मा निर्वाचित माओवादीका युवराज भट्टराई पनि नयाँ हुन् ।
यसैगरी सर्लाही–४ (२) मा माओवादीका फकिरा महतो र धनुषा–२ (१) मा एमालेका लखन दास तत्मा निर्वाचित हुँदै पहिलो पटक सांसद बनेका छन् । सप्तरीका ६ स्थानको नतिजा आउँदा प्रदेशसभा पुग्ने पाँच नयाँ छन् । यसमध्ये चार जनमत पार्टीका रहेका छन् ।
क्षेत्र नं ३ (२) मा शम्भुकुमार साह, क्षेत्र नं २ (१) मा सतिशकुमार सिंह, क्षेत्र नं २ (२) मा महेशप्रसाद यादव र क्षेत्र नं १ (२) मा सकिल मियाँ निर्वाचित भएका छन् । क्षेत्र नं १ (१) मा जितेका एमालेका राजकुमार लेखी पनि नयाँ नै हुन् । लेखीसँग यसअघि प्रदेश सरकारको नीति तथा योजना आयोगमा सदस्य भएर काम गरेको अनुभव छ ।
मन्त्री पराजित
यस्तै, २०७४ मा निर्वाचित भई प्रदेशका महत्वपूर्ण मन्त्रालयको जिम्मेवारी सम्हालेका केही मन्त्रीले भने यसपटकको निर्वाचनमा पराजय व्यहोर्नु परेको छ । भूमि व्यवस्था, कृषि तथा सहकारी मन्त्रालय हुँदै हाल अर्थमन्त्री रहेका शैलेन्द्र साह सप्तरी क्षेत्र नं २ (१) मा पराजित भएका छन् ।
यस्तै पाँच वर्षसम्म भूमि व्यवस्था, कृषि तथा सहकारी राज्यमन्त्री भएका योगेन्द्र राय यादव पनि पराजित भएका छन् । उनी रौतहट–१ (२)मा उम्मेदवार थिए । प्रदेश मुख्य न्यायाधिवक्ताबाट राजीनामा दिएर निर्वाचनमा होमिएका दीपेन्द्र झा पनि पराजय व्यहोर्नु परेको छ ।
