उत्तर कोरियाले एउटा लामो दूरीको र दुई वटा छोटो दूरीको बलिस्टिक क्षेप्यास्त्र प्रहार गरेको दक्षिण कोरियाका जोइन्ट चिफ्स अफ स्टाफले बताएका छन् । जापानका प्रधानमन्त्री फुमिओ किस्हिदाले एउटा अन्तरमहादेशीय बलिस्टिक क्षेप्यास्त्र हुनसक्ने बताएका छन् ।
बुधबार प्योङ्याङले एकैदिनमा सबैभन्दा धेरै क्षेप्यास्त्रहरू प्रहार गरेपछि यस्तो घटनाक्रम देखापरेको हो । प्योङ्याङको एउटा बालिस्टिक क्षेप्यास्त्रले बुधबार नर्दर्न लिमिट लाइन भनिने दुई कोरियाबीचको एउटा विवादित जलसीमा पार गरेको थियो ।
बुधबार एउटा क्षेप्यास्त्र दक्षिण कोरियाको जल क्षेत्रमा खसेको थियो । सोलले आफ्ना तीनवटा क्षेप्यास्त्र प्रहार गरेर त्यसको जबाफ दिएको छ । अमेरिका र दक्षिण कोरियाले आफ्नो अहिलेसम्मकै ठूलो संयुक्त अभ्यास गरिरहँदा यी घटना भएका हुन् ।
उक्त अभ्यासलाई प्योङ्याङले कडा शब्दमा आलोचना गर्दै त्यसलाई आक्रामक र उक्साहटपूर्ण भएको बताएको छ । बिहीबारको पछिल्लो क्षेप्यास्त्र प्रक्षेपणका कारण जापान सरकारले आफ्ना केही भेगका बासिन्दाका लागि दुर्लभ रूपमा आपतकालिन सजगताको चेतावनी दिएको थियो ।
उसले उत्तरी क्षेत्रका केही भागमा मानिसहरूलाई घरभित्रै बस्न भनेको छ । टोकियोले सुरुवाती रूपमा क्षेप्यास्त्रले जापानमाथिको आकाश तय गरेको जनाएको थियो ।
तर त्यहाँका रक्षामन्त्रीले पछि त्यो जापानी द्वीप समूह नकाटेको तर सी अफ जापानमाथि विलय भएको बताएका थिए । प्रधानमन्त्री किस्हिदाले पछि उत्तर कोरियाका एक पछि अर्को क्षेप्यास्त्र प्रक्षेपणको निन्दा गर्दै त्यसलाई नियमहरूको उल्लङ्घन बताएका थिए ।
जापानमाथि उत्तर कोरियाले पाँच वर्षमा पहिलो पटक बलिस्टिक क्षेप्यास्त्र प्रहार गरेको एक महिनापछि यो घटना भएको हो ।
