जुम्ला । गुठीचौर गाउँपालिका–२ मा रहेको जुम्लादेखि डोल्पा जोड्ने कोदारी पुल गएको असोज १९ गते आएको अविरल एक साताको वर्षाले बगाएपछि स्थानीयवासी, नेपालीसेना, नेपाल प्रहरीको सहयोगमा पुल निर्माण गरी सञ्चालनमा आएको छ । सो गाउँपालिकाको पहलमा काठेपुल निर्माण गरिएको हो ।
पुल बगाएर यस क्षेत्रमा यातायात प्रभावित भएको थियो । बाढीपहिराले मोटरेबल पुल बगाएपछि गुठीचौर गाउँपालिका माथिल्लो भेगमा पर्ने मणिसाँघु, मुनिगाउँ, डिल्लीकोटसहित धेरै गाउँबस्तीमा अघोषित नाकाबन्दी जस्तै भएको छ । गाउँहरूमा दैनिक उपभोग्य वस्तुदेखि ओसारपसार गर्न निकै असज भएपछि गुठीचौर गाउँपालिका–१ र २ को अगुवाइमा दुईदिने श्रम शिविरबाट मोटरेबल काठेपुल निर्माण गरिएको गाउँपालिका अध्यक्ष दानबहादुर बुढाले बताए ।
नेपाली सेनाको नन्दाबक्स गण जुम्लाका जमदार भेषबहादुर रायमाझीको नेतृत्वमा ३० जना नेपाली सेनाको जनशक्ति, नेपाल प्रहरी र स्थानीयवासीसहित दुईजनाले श्रमदान गरी दुई दिनमा काठेपुल निर्माण गरिएको हो । पुल निर्माण हुँदा गुठीचौरको माथिल्लो क्षेत्रसहित डोल्पा जिल्लाको तल्लो क्षेत्रसम्म आवतजावत गर्न सहज हुने भएको छ । गुठीचौर गाउँपालिका–१ का वडाध्यक्ष अर्जुनकुमार महताराका अनुसार बाढीले पुल बगाएपछि माथिल्लो गुठीचौर गाउँबस्ती पालिका मुकामसँग पुग्न सवारीसाधन सञ्चालनमा निकै समस्या भएको थियो ।
पुल निर्माण गर्नका लागि आयोजना निर्माण गरेर उपभोक्ता समितिमार्फत गर्दा निकै समय लाग्ने र आवतजावत गर्न निकै समस्या भएकाले श्रमदानमार्फत नै मोटरेबल काठेपुल निर्माण गरिएको वडाध्यक्ष महताराले जानकारी दिए। दुईदिनमै काठेपुल बनाउन सहयोग गर्ने स्थानीयवासी, नेपाली सेना, सशस्त्र प्रहरी र नेपाल प्रहरीलाई विशेष धन्यवादसमेत दिए। बगाएको पुल निर्माण गर्न १० लाख खर्च लाग्ने थियो । तर दुईदिने श्रम शिविर सञ्चालन गरी मोटरेबल काठेपुल निर्माण भई सञ्चालनमा आएको गुठीचौर गाउँपालिकाले जनाएको छ ।
