काठमाडौँ । प्रहरी महानिरीक्षक धिरजप्रताप सिंह इन्टरपोलको महासभामा सहभागी हुन भारत प्रस्थान गरेका छन् ।
भारतको नयाँ दिल्लीमा कात्तिक १ गतेदेखि ४ गतेसम्म संचालन हुने इन्टरपोलको ९०औं महासभामा सहभागी हुन महानिरीक्षक सिंह सोमबार त्यसतर्फ प्रस्थान गरेका हुन् ।
महानिरीक्षक सिंहको नेतृत्वमा प्रहरी नायव महानिरीक्षक उमेशराज जोशी, प्रहरी उपरीक्षक अनुपम शमशेर जवरा, प्रहरी निरीक्षक यमकुमार श्रेष्ठ समेत नेपाल प्रहरी तथा सशस्त्र प्रहरी बल नेपालको तर्फबाट ५ सदस्यीय टोली त्यसतर्फ प्रस्थान गरेको हो ।
उनीहरुलाई प्रहरी अतिरिक्त महानिरीक्षकहरू सहकुलबहादुर थापा, उत्तमराज सुवेदी, दिवेश लोहनी र रवीद्रबहादुर धानुक, प्रहरी नायव महानिरीक्षकहरू लगायत वरिष्ठ प्रहरी अधिकृतहरूले सोमबार साँझ त्रिभुवन अन्तर्राष्ट्रिय विमानस्थलमा विदाई गरे ।
१९५ इन्टरपोल सदस्य राष्ट्रका प्रहरी प्रमुख र प्रतिनिधिहरू सहभागी हुने महासभामा सदस्य राष्ट्रहरुको वार्षिक प्रतिबेदन पेश हुने, कार्यकारिणी समितिका विभिन्न पदाधिकारीहरुको निर्वाचन हुने र विभिन्न सदस्य राष्ट्रहरूबीच अन्तर्राष्ट्रिय प्रहरी समन्वय, प्रतिआतङ्कवाद, आर्थिक अपराध, संगठित अपराध जस्ता विषयहरुमा संकल्प प्रस्तावमाथि छलफल हुने कार्यक्रम रहेको छ ।
प्रहरी महानिरीक्षक सिंहको अनुपस्थितिमा प्रहरी अतिरिक्त महानिरीक्षक सहकुल बहादुर थापाले प्रहरी प्रधान कार्यालयको दैनिक प्रशासनिक कामकाजको जिम्मेवारी सम्हाल्ने प्रहरी प्रधान कार्यालयले जनाएको छ ।
