काठमाडाैँ । पशुपति क्षेत्र विकास कोषले प्रकाशन गरेका पुस्तक र मन्दिरमा चढाइएका सामग्री खरिद गर्न चाहनेका लागि बिक्री कक्षको व्यवस्था गरिएको छ । बडा दसैँका अवसरमा कोजाग्रत पूर्णिमादेखि यस्तो व्यवस्था गरिएको कोषका धर्म संस्कृति संरक्षण महाशाखा प्रमुख गौरीशङ्कर पराजुलीले जानकारी दिए ।
बिक्री कक्षमा कोषले दोस्रो संस्करणका रुपमा प्रकाशन गरेको शिवमहापुराणको नेपाली अनुवाद ग्रन्थलगायत पुस्तक राखेको छ । कोषले लिङ्ग पुराण पनि नेपालीमा अनुवाद गरी प्रकाशनको अन्तिम तयारीमा लागेको जनाइएको छ ।
मन्दिरमा भक्तजनले चढाएका विभिन्न सामग्रीसमेत किन्न चाहनेले पशुपतिनाथको पश्चिम ढोकाअघिको बिक्री कक्षमा सम्पर्क गर्न सक्नेछन् । बिक्री कक्ष बिहान ७ बजेदेखि बेलुकी ७ बजेसम्म खुल्ने कोषका सूचना अधिकारीसमेत रहेका पराजुलीले बताए ।
