काठमाडाैँ । जिल्लाका किसानले सरकारले सूचीकृत नगरेको धान लगाउँदा धान पसाएर पनि दाना नलाग्ने समसया देखिएको छ ।
प्रधानमन्त्री कृषि आधुनिकिकरण परियोजना कार्यान्वयन इकाई चितवनका प्रमुख धनबहादुर थापा मगरका अनुसार पश्चिम चितवनमा यो समस्या देखिएको हो । उनले भने,“सूचीकृत नभएका धान र २५ वर्ष पुराना धानको जात लगाउने गर्दा धान पसाए पनि दाना नलाग्ने समस्या देखिएको छ ।” अहिले जिल्लामा सावित्री धान र भारतबाट आयातित चन्दन धानमा समस्या देखिएको हो । चन्दन धान सरकारको सूचीकृत धान नरहेको उनले जानकारी दिए ।
थापाका अनुसार जिल्लामा लगाइएको धानको ३० प्रतिशतमा समस्या देखिएको हो । कीराको समस्यासँगै धानमा दाना नलाग्ने समस्या देखिएको हो । सूचीकृत नभएका जात जिल्लाका विभिन्न एग्रोभेटले किसानको सम्म पु¥याउँदा समस्या आएको उनले बताए । धान पसाउने समयमा पानी पर्दा परागसेचनसमेत हुन नसकेका कारण धान पसाए पनि दाना लाग्न नसकेको कार्यालयले जनाएको छ । कार्यालयका अनुसार जिल्लामा यसवर्ष धान उत्पादनमा कमी आउने अनुमान गरिएको छ । जिल्लामा उत्पादनमा १० देखि १५ प्रतिशत गिरावट आउने अनुमान गरिएको थापाले बताए ।
किसानको खेतमा अहिलेको धानमा शीत ब्लाइट (पातको फेद डडुवा), नेक ब्लाष्ट (घाँटी मरुवा), ह्वाइट फ्लाइ(सेतो झिङ्गा), युरिया र पोटासको कमीका कारण पहेँलो हुने समस्या र धानमा दाना नलाग्ने समस्या देखिएको छ । उनका अनुसार जिल्लाका सातै पालिकामा यो समस्या देखिएको छ ।
जिल्लामा २२ हजार नौ सय ७७ हेक्टर क्षेत्रफल धानखेती गरिएको छ । धानमा समस्या देखिएपछि आकस्मिक बाली संरक्षण कार्यक्रम अन्तर्गत विषादी वितरण गरी रोग नियन्त्रणका लागि काम गरिएको थापाले जानकारी दिए । उनका अनुसार गुणस्तरीय बीउको प्रयोग र प्राविधिकको सल्लाहा अनुसार धान लगाउनुपर्ने उनले बताए ।
