गण्डकी । निरन्तरको झरीले जनसाधारणमा कष्ट थपेको छ । सडक, बिजुलीजस्ता जरुरी सेवा रोकिँदा जनजीवन प्रभावित बनेको हो । कतै पहिराको त्रास छ, कतै डुबानको । गए रातिदेखि अवरुद्ध पोखरा–बागलुङ राजमार्ग अपराह्नपछि बल्ल सञ्चालनमा आएको छ । पर्वतको मोदी गाउँपालिका–५ अम्बोटमा पहिरो खस्दा सवारी आउजाउ रोकिएको थियो ।
डोजर लगाएर पहिरो पन्छाएपछि बिहीबार दिउँसोे १ः३० बजेदेखि सडक खुलेको ट्राफिक प्रहरी कार्यालय पर्वतका प्रहरी सहायक निरीक्षक ताराप्रकाश खत्रीले जानकारी दिए । “गए राति ३ बजेदेखि सडक अवरुद्ध थियो, चार घण्टा लगाएर सञ्चालनमा ल्यायौँ”, उनले भने ।
मध्यपहाडी लोकमार्गमा पर्ने उक्त खण्डमा पहिरो खस्दा पोखरा हुँदै धौलागिरि क्षेत्रमा चल्ने छोटो तथा लामो दूरीका सवारीसाधन बाटैमा रोकिएका थिए । यात्रु घण्टौँसम्म जाममा फसेका थिए । बागलुङ–पोखरा चल्ने जीपका चालक राजेन्द्र विकले पहिरो हटाएपछि यात्रा सहज भएको बताए । उनले ग्रामीण भेगका सडकमा बर्सातले झन क्षति पु¥याएको उल्लेख गरे । “तीजको दिनदेखि नै पानी परिरहेको छ, गाउँमा जहीँतहीँका बाटा बिग्रेका छन्, जोखिम मोलेर यात्रा गर्नुपर्छ”, विकले भने ।
बर्सातसँगै परेको चट्याङले विद्युत् सेवामा पनि अवरोध पु¥याएको छ । पोखराको बलाममा गए राति परेको चट्याङले तार चुँडाल्दा पर्वत, बागलुङ, म्याग्दी र मुस्ताङमा विद्युत् अवरुद्ध बनेको नेपाल विद्युत् प्राधिकरण बागलुङ वितरण केन्द्रका प्रमुख दिलीप मरासिनीले बताए । “तारमा क्षति पुगेका ठाउँमा अहिले मर्मतकार्य चलिरहेको छ, साँझसम्म बिजुली बल्छ”, उनले भने ।
बिजुली अभावले नेटवर्क कमजोर बन्दा टेलिफोन र इन्टरनेट सेवा पनि प्रभावित हुन पुगेको छ । वर्षा ऋतु सकिने बेलातिर परेको झरीले जनजीवन कष्टकर बनेको हो । पोखरा आसपासको मौसम अहिले पनि धुम्म छ ।
