काठमाडाैँ । काठमाडौँ महानगरपालिकाले लामो समयदेखि कर नबुझाएका नेपाली सेनाको मुख्यालय, प्रहरी प्रधान कार्यालय, समाज कल्याण परिषद् लैनचौरलगायत १० करदातालाई आगामी १० दिनभित्र बहाल कर बुझाउन पत्राचार गरेको छ । पत्रमार्फत पटक पटक आग्रह गर्दा पनि बहाल कर नतिरेपछि कामपा राजस्व विभागले आज फेरि १० दिनको मिति तोकेर उक्त समयभित्र सम्बन्धित वडा कार्यलयमा कर बुझाउन पत्र पठाएको हो ।
कामपा राजस्व विभागका प्रमुख डा शिवराज अधिकारीले तोकिएको समयसीमाभित्र पनि तोकिएको शीर्षकअनुसार कर असुलउपर नभए राजस्व ऐन, २०७५ बमोजिम कारबाही गरी सरकारी बाँकी सरह उपर गरी आवश्यक प्रक्रिया अगाडि बढाउने बताए । बिहिबार पत्राचार गरिएकामा शङ्करदेव क्याम्पस, रत्नराज्य लक्ष्मी क्याम्पस, नेपाल ल क्याम्पस, वीर अस्पताल, दशरथ रङ्गशाला, सरस्वती क्याम्पस र नेपाल कमर्स क्याम्पसलाई पनि बहालकर तिर्न पत्राचार गरेको छ ।
कामपाले यही भदौ २१ गते पनि खाद्य संस्थान, हाइट फिल स्कुल नयाँबजार, रञ्जना ट्रेड सेन्टर न्युरोड, साझा भण्डार भोटाहीटी, राष्ट्रिय नाचघर जमल, चेम्बर अफ कमर्स जमल, कर्मचारी सञ्चय कोष ठमेल, नेपाल विद्युत प्राधिकरण रत्नपार्क, नेशनल ट्रेडिङ लिमिटेड सिंहदबार, नेपाली जामे मस्जिद बागबजार, कृषि सामग्री संस्थान टेकु, मनमोहन मेमोरियल कलेज एण्ड शिक्षण अस्पताल स्वयम्भू, आर बी कम्प्लेक्स न्युरोड, काठमाडौँ प्लाजा पुतली सडक, नेपाल सेयर मार्केट पुतली सडक, सिविक हस्पिटल प्रालि, डेन्टल कलेज सामाखुसी काठमाडौँ गरी १७ करदातालाई पत्र पठाएको थियो । कामपा राजस्व विभाग प्रमुख डा अधिकारीका अनुसार यसरी असुल उपर हुनुपर्ने रकम करिब रु ५० करोड रहेको छ ।
