विराटनगर । मोरङ कारागारका कैदीबन्दीमा कोरोना संक्रमण फैलिएको छ । यसै क्रममा एक कैदीको बिहीबार राति उपचारका क्रममा मृत्यु भएको छ । ज्यान मुद्दाका कैदी नीरबहादुर नेपालको उपचारका क्रममा मृत्यु भएको हो ।
कैदीबन्दीलाई अत्याधिक ज्वरो आएपछि कोसी अस्पतालमा उपचार गर्ने क्रममा एन्टिजेन परीक्षण गर्दा १८ मध्ये १६ जनाको रिपोर्ट पोजेटिभ आएको अस्पतालका मेडिकल सुपरिटेन्डेन्ट डा यज्ञ खरेलले जानकारी दिए ।
उनीहरुलाई कोभिड अस्पतालमा सार्ने तयारी गरिएको छ । उनकाअनुसार एन्टिजेन परीक्षणको रिपोर्ट पोजेटिभ हुने ९९ प्रतिशतलाई कोभिड हुने निश्चित हुन्छ ।
उनीहरुलाई कोसीको कोभिड अस्पतालमा सारेर उपचार गर्ने तयारी भइरहेको मोरङका प्रमुख जिल्ला अधिकारी काशीनाथ दाहालले बताए । तीनसय जना क्षमताको मोरङ कारागारमा करिव एक हजार कैदीबन्दी राखिएको छ ।
