सिन्धुपाल्चाेक । बागमती प्रदेशको विपद्सेवी पुरस्कार मेलम्ची नगरपालिकाले पाएको छ । विपद् जोखिम न्यूनीकरण तथा व्यवस्थापनको क्षेत्रमा उल्लेखनीय योगदान पु¥याएको भन्दै बागमती प्रदेश सरकारले मेलम्ची नगरपालिकालाई सम्मान गरेको हो ।
प्रदेशका मुख्यमन्त्री राजेन्द्रप्रसाद पाण्डेले मेलम्ची नगरपालिकाका प्रमुख आइतमान तामाङलाई प्रमाणपत्र हस्तान्तरण गरे । आन्तरिक मामिला तथा कानून मन्त्रालय एवं सम्मान र पदक सिफारिस समितिले पदक तथा सम्मानका लागि सिफारिस गरेको थियो । समितिका अध्यक्ष कृष्णप्रसाद शर्मा खनालले २०७९ जेठ १५ गते सम्मान घोषणा भएको जानकारी दिए । विसं २०७८ असार १ गते र त्यसपछि आएको बाढी र अन्य विपद्को जोखिम न्यूनीकरण र व्यवस्थापनमा महत्वपूर्ण भूमिका निर्वाह गरेको भन्दै प्रदेश सरकारले सम्मान गरेको हो ।
सम्मानपत्र ग्रहणपश्चात् मेलम्ची नगरपालिकाका प्रमुख आइतमान तामाङले मेलम्चीमा विपद् प्रभावितको पुनःस्थापना तथा स्थायी आवास निर्माणका लागि प्रदेश सरकार सङ्घ सरकारको सहयोगको अपेक्षा राखे । उनले स्थानीय तह मेलम्ची एक्लैले केही गर्न नसक्ने भन्दै बाढी प्रभावितको पुनरुत्थानका लागि प्रदेश सरकारले चासोका साथ हेर्नुपर्नेमा जोड दिए । उद्धार तथा राहतको काममा स्थानीय सरकारले भ्याएसम्मको काम गरेको उल्लेख गर्दै तामाङले आगामी दिनमा पनि हातेमालो गर्दै तीनै तहसँगको सहकार्य आवश्यक रहेको बताए।
