काठमाडौँ । नेकपा एमालेका सांसद प्रदीप ज्ञवालीले गठबन्धन सरकार जनताको समस्या समाधान गर्ने कुरामा बेखबर आरोप लगाएका छन् । बिहीबार प्रतिनिधि सभाको विशेष समयमा बोल्दै ज्ञवालीले शैक्षिक सत्र शुरु भएको लामो समयसम्म पनि विद्यार्थीको पाठ्यपुस्तक पुर्याउन नसक्नु लज्जास्पद भएको बताए ।
उनले सरकारको गैरजिम्मेवारपनले सबै जनतालाई आहत तुल्याएको भन्दै जनताको समस्या समाधान गर्ने गरेर जनतामा बढ्दो महंगीको राहतका प्याकेज उपलब्ध गराउने हिसावबाट रुलिङ गर्न सभामुख समक्ष आग्रह गरे ।
ज्ञवालीले भारतबाट पेट्रोलियम पदार्थको मूल्य घटेर आउँदा समेत सरकारले जनतासँग लुट्न मूल्य नघटाइरहेको आरोप लगाए । उनले किसानले मलखाद नपाइरहेको भन्दै सरकार यत्तिका दिनसम्म पनि गैरजिम्मेवार भएर बस्न नमिल्ने बताए ।
उनले गठबन्धन सरकारले जनताका समस्या समाधान गर्न नसकेको भन्दै सरकार जनताबाट कर उठाउनको निम्ति मात्रै हो ? भन्दै प्रश्न गरे ।साथै उनले जनतालाई मलखाद्य र विद्यार्थीलाई पाठ्यपुस्तक हतियार किन्न पैसा पुग्छ तर मल किन्न पैसा पुग्दैन ? भन्दै प्रश्न गरे ।
उनले भने,‘बढ्दो महंगी, मूल्यवृद्धि र अत्यावश्यक वस्तुको मूल्यवृद्धि छ । सरकार बेखबर देखिएको छ । डिजेल १८ र पेट्रोलमा १५ रुपैयँँ घटाएर पठायो तर आज एक हप्ता भयो मूल्य घटाइएको छैन । बढेर आएको भए रातारात बढाइन्थ्यो । मैले सार्वजनिक कार्यक्रममा बोलेको कुरा अमेरिकामा खाना खाइरहेको फोटो हालेर ट्रोल बनाउनु भएछ । त्यसो गरेर उहाँहरुको भान्सामा सस्तो हुन्छ भने मेरो शुभकामना छ । यी सारा समस्याको निम्ति गम्भीरतापूर्वक सोच्नुपर्ने बेलामा बहस त हामीले कहाँ चलाइरहेका छौँ । एम अधिकारी को हो भनेर खोजिरहेका छौँ । सम्बन्धित व्यक्ति म त्यो पार्टीमा छैन, २०७३ सालदेखि भन्नुभएको छ । सम्बन्धित पार्टी भन्छ, ती मान्छे हाम्रो पार्टीमा छैनन् । सभामुखको रुलिङ त कायमै होला नि । कायम छ कि छैन ? छैन भने बेग्लै कुरा भयो, छ भने एउटा विषयमा विषयान्तर गरेर आज मुलुकले भोगिरहेका समस्या के हुन् ? जनताको यो पीडाले हामी सबैलाई छुनु पर्छ कि पर्दैन ? यो साझा विषय होला ? अहिलेपनि किसानलाई मल दिन नसक्ने भन्दा गैर जिम्मेवार के हुन्छ । यो सरकार जनताबाट कर उठाउनको निम्ति मात्रै हो ? हतियार किन्न पैसा पुग्छ तर मल किन्न पैसा पुग्दैन ?’
