काठमाडौँ । काठमाडौँमा राहदानी बनाउन राहदानी विभाग पुगेका सेवाग्राहीलाई एकदिनमै काम हुन्छ भन्दै रकम असुली गरेको आरोपमा प्रहरीले चार जनालाई पक्राउ गरेको छ ।
प्रहरी वृत्त कालिमाटीको टोलीले उनीहरुलाई पक्राउ गरेको हो । पक्राउ पर्नेमा सिन्धुपाल्चोकका रामबहादुर बोगटी, धनकुटाका श्यामकुमार राई, सिन्धुपाल्चोकका राम पौडेल र काठमाडौंका विवेक गुरुङ छन् ।
प्रहरीकाअनुसार पक्राउ परेका मध्ये गुरुङको चाबहिलमा रोज बर्ड नामक फोटो स्टुडियो रहेको पाइएको छ । उनीहरुले विभिन्न व्यक्तिका नाममा आवेदन भरेको ३२ वटा अनलाइन फारम पनि प्रहरीले बरामद गरेको छ ।
पक्राउ परेकाहरुमाथि लिखतसम्बन्धी कसूरमा अनुसन्धानका लागि चार दिन म्याद लिइएको वृत्तले जनाएको छ ।
