बुटवल । भैरहवास्थित गौतमबुद्ध अन्तर्राष्ट्रिय विमानस्थलबाट प्रहरीले सुनका गहनासहित एक यात्रुलाई पक्राउ गरेको छ । जजिराको जहाजबाट आएका पाल्पा रिब्दिकोटका राजेन्द्र कुँवरले मोजामा लुकाइ राखेको अवस्थामा १ सय २२ ग्राम सुनका गहना बरामद गरेको प्रहरीले जनाएको छ ।
कतारबाट कुवेत हुँदै भैरहवा आएका कुँवरले अराईभल भन्सार एरियामा जाँच गर्ने क्रममा लुकाई राखेको अवस्थामा ३ वटा सिक्री र एउटा ब्रास्लेट बरामद भएको गौतमबुद्ध अन्तराष्ट्रिय विमानस्थलका निमित्त भन्सार अधिकृत तिर्थराज पासवानले जानकारी दिए। उक्त गहनाको अन्दाजी मूल्य ९ लाख ९० हजार हुने विमानस्थल भन्सारले जनाएको छ ।
बैधानिक रुपमा ५० ग्राम सम्म सुन ल्याउन पाइने व्यवस्था रहेपनि अन्य गहनाको हकमा पूर्व जानकारी गराउनु पर्ने भएपनि केही त्यस्तो जानकारी नगराएको पाइएको छ । पक्राउ परेका उनलाई बरामद सामानसहित आवश्यक अनुसन्धानको लागि राखिएको छ।
