धनगढी । कैलालीको धनगढी उपमहानगरपालिकाको प्रमुखमा स्वतन्त्र उम्मेदवार गोपाल हमालले आफ्ना निकटतम् प्रतिद्वन्द्वी भन्दा ११ हजार मतान्तरले अगाडी रहेका छन् ।
शनिबार विहान ५१ हजार ६५ मत गणना हुँदा हमालले २२ हजार ५४१ मत प्राप्त गरेका छन् । उनका निकटतम् प्रतिद्वन्द्वी गठबन्धनका तर्फबाट नेपाली काङ्ग्रेसका उम्मेदवार नृपबहादुर वडले ११ हजार ५४४ मत प्राप्त गरेका छन् । नेकपा (एमाले) का उम्मेदवार रणबहादुर चन्दले छ हजार ४२३ मत प्राप्त गरेकाे भएको मुख्य निर्वाचन अधिकृतको कार्यालयले जानकारी दिएको छ ।
यसैगरी, उपमेयरमा एमालेका कन्दकला रानाले गठबन्धनका तर्फबाट नेकपा (माओवादी केन्द्र) का उम्मेदवार शान्ति अधिकारीलाई उछिनेका छन् । रानाले १० हजार ८८० र अधिकारीले १० हजार ७०२ मत प्राप्त गरेका छन् । दुवैबीच कडा प्रतिस्पर्धा भइरहेको छ ।
धनगढीमा जम्मा ६३ हजार ७१५ मत खसेको थियो । अब १२ हजार ६२० मतमात्रै गणना गर्न बाँकी रहेको छ ।
