डाेटी । आगामी वैशाख ३० गते हुने स्थानीय तहको निर्वाचनका लागि उमेदवार चयनका लागि सत्ता गठबन्धनमा अझै सहमति जुट्न सकेको छैन । उमेदवारी दर्ता गर्ने दिन नजिकिए पनि डोटीमा सत्ता गठबन्धनमा अझै सहमति जुट्न नसकेको हो ।
सत्तारुढ गठबन्धनको चुनावी तालमेलबारे सहमति जुटाउन पटक–पटक बैठक बसे पनि सहमति जुट्न नसकेको नेताहरू बताउँछन् । जिल्लास्तरमा गठबन्धनका नेताबीचमा सहमति हुन नसकेपछि सहमतिको जिम्मा केन्द्रलाई नै दिएको नेपाली कांग्रेस डोटीका सभापति नरेन्द्रबहादुर सिंहले बताए । उनले भने, “सहमतिका लागि पटक–पटक बैठक राखिए पनि सहमति जुट्न सकेन । हामीले सहमति गर्न नसक्दा केन्द्रलाई जिम्मा दिएका छौँ, केन्द्रबाट नयाँ परिपत्र नआएसम्म जिल्लामा गठबन्धन हुने अवस्था छैन ।”
सत्ता साझेदार दल माओवादी केन्द्र र एकीकृत समाजवादीको आ–आफ्नै अडानका कारण सहमति जुट्न नसकेको उनको भनाइ छ । उता एकीकृत समाजवादीका डोटी जिल्ला उपाध्यक्ष शिवराज खड्काले कांग्रेस र माओवादीका बीचमा कुरा नमिलेका कारण गठबन्धनका नेताहरूबीच सहमति जुट्न नसकेको बताए । उनले भने, “हाम्रो तर्फबाट सहमतिका लागि कुनै समस्या छैन, कांग्रेस र माओवादीका केही साथीका कारण समस्या देखिएको हो, अब केन्द्रले समाधान गरेर गठबन्धन हुन्छ ।”
सत्ता गठबन्धनको बैठकमा कांग्रेसले जिल्लाका नौवटा पालिकामध्ये दिपायल सिलगढी तथा शिखर नगरपालिकासहित सात पालिका र ४५ वडा तथा नेकपा (माओवादी केन्द्र)ले पनि दिपायल सिलगढी एक नगरपालिकासहित चार पालिका र ३४ वडा दाबी गरेपछि विवाद सिर्जना भएको बताइएको छ । एकीकृत समाजवादीका जिल्ला अध्यक्ष दीर्घराज बोगटीका अनुसार आफूले जिल्लाका दुई पालिका र १६ वडा मागेको जानकारी दिए । यस्तै राष्ट्रिय जनमोर्चाले तीन वडामा आफ्नो दाबी पेश गरेको छ ।
यसअघिको स्थानीय तहको निर्वाचनमा जिल्लाका नौवटा स्थानीय तहमध्ये कांग्रेसले तीन र माओवादी केन्द्रले एउटा स्थानीय तहमा विजयी भएको थियो । नेकपा (एमाले)ले भने पाँच स्थानीय तहमा विजयी गरेको थियो । यस आधारमा सत्ता गठबन्धनका मुख्य दल कांग्रेससँग तीन, माओवादीसँग एक र एकीकृत समाजवादीसँग एक स्थानीय तहको नेतृत्व कायम छ ।
