काठमाडौँ । आँखामा खुर्सानीको धुलो छर्केर सुन तथा नगद लुटेको आरोपमा प्रहरीले दुई जनालाई पक्राउ गरेको छ । महानगरीय प्रहरी परिसर काठमाडौंको टोलीले लुटपाट गर्ने गिरोहका दुई जनालाई पक्राउ गरेको हो ।
पक्राउ पर्नेमा दाङ घर भई काठमाडौं महानगरपालिका–१० शान्तिनगर बस्ने २८ वर्षीय महेश विश्वकर्मा र २४ वर्षीय राजेन्द्र सिन रहेका महानगरीय प्रहरी परिसर काठमाडौंका प्रहरी उपरीक्षक दिनेशराज मैनालीले जानकारी दिए । प्रहरीले विश्वकर्मालाई गत बिहीबार र सिनलाई शनिबार दाङ प्रहरीको सहयोगमा पक्राउ गरेको हो ।
प्रहरीकाअनुसार घटना गत बुधबार भएको थियो । राति साढे ८ बजे काठमाडौं महानगरपालिका–७ चाबहिलस्थित ओम शाही टञ्च सेन्टर सुन पसलका सञ्चालक भारत घर भई चाबहिल बस्ने ३४ वर्षीय अमोल भोस्लेले पसल बन्द गरी घर फर्किन लागेका थिए । उनले ४२ तोला सुन र १२ लाख नगद पनि बोकेका थिए ।
चुच्चेपाटीस्थित एक पार्किङस्थल नजिकै पुग्दा समूहमा स्कुटरमा आएका केही व्यक्तिहरूले उनको आँखामा खुर्सानीको धुलो फ्याँके र उनलाई कुटपिट समेत गरेर सुन तथा नगद राखेको झोला लुटेर फरार भएका थिए । सूचना पाएपछि महानगरीय प्रहरी वृत्त, गौशालाबाट प्रहरी अधिकृतसहितको टोली खटिएको थियो ।
प्रहरीले उनीहरूले काठमाडौं छाड्न सक्ने भन्दै नाकामा समेत कडाइ गरेको प्रहरी उपरीक्षक मैनालीले बताए । प्रहरीले विश्वकर्माबाट बा ७४ प ९५६० नम्बरको मोटरसाइकल र ६६ हजार नगद बरामद गरेको छ। सिनबाट प्रहरीले रा ४ प ११२० नम्बरको मोटरसाइकल र २३१ ग्राम पहेँलो धातु, एक लाख नगद, धारिलो हतियार, एउटा तरवार बरामद गरेको छ।
