काठमाडौँ । त्रिभुवन विश्वविद्यालय सेवा आयोगको कार्यालयका तत्कालिन प्रमुखसहित ६ जनाविरुद्ध भ्रष्टाचार मुद्दा दायर भएको छ ।
परीक्षा परिणाम फेरबदल गरेको आरोपमा अख्तियार दुरुपयोग अनुसन्धान आयोगले मंगलबार प्रा.डा टेकनाथ ढकालसहित ६ जनाविरुद्ध मुद्दा दायर गरेको हो। मुद्दा दायर भएकामा सहप्राध्यापक केशव घिमिरे, राजेश्वर न्यौपाने, इन्दिरा घिमिरे, त्रिवि सेवा आयोगका तत्कालीन प्रमुख परशुराम कोइराला र मुख्य कार्यालय सहायक बच्चुराम पाण्डे छन् ।
उनीहरुविरुद्ध तीन महिनादेखि एक वर्षसम्म र पाँच हजारदेखि दस हजार रुपैयाँ जरिवानाको मागदाबी सति मुद्दा दायर गरिएको अख्तियार प्रवक्ता श्यामप्रसाद भण्डारीले जानकारी दिए ।
सेवा आयोगले २०७३ सालमा लिएको उपप्रशासक, पुस्तकालय अधिकृत, प्राविधिक अधिकृत, प्राविधिक अधिकृत, मुख्य प्राविधिक सहायक, लेखा सहायक, पुस्तकालय सहायक र प्राविधिक सहायक पदको लिखित परीक्षा लिएको थियो ।
त्यो परीक्षामा व्यापक अनियमितता र आर्थिक चलखेल गरी सक्षम र उत्कृष्ट उम्मेदवारलाई पाखा लगाएर उत्तरपुस्तिका परीक्षण गरेको आरोप आयोगलाई लागेको थियो । गलत मनसाय राखी जम्मा प्राप्ताङ्क हेरफेर गरेको, मेरिट सूची फेरबदल गरेको अनुसन्धानमा खुलेको अख्तियारले जनाएको छ।
