पोखरा । पोखराको सूर्यदर्शन सहकारीपीडितले राष्ट्रिय स्वतन्त्र पार्टीका नेता कार्यकर्ताहरूले घरघर पुगेर आफूहरूलाई धम्क्याउने गरेको आरोप लगाएका छन् ।
सूर्यदर्शन सहकारीपीडित संघर्ष तथा तदर्थ समिति र सहकारीपीडित संघ कास्कीले बुधबार विज्ञप्ति जारी गरी रास्वपा नेता तथा कार्यकर्ताले आफूहरुलाई घरघरमा आएर धम्क्याउने गरेको आरोप लगाएका हुन् ।
अहिले पोखराका चोकचोकमा गरिएका आन्दोलन सहकारीपीडितविरुद्ध भएको जिकिर उनीहरुले गरेका छन् । पीडितहरूले आफ्ना पक्षमा उभिन र बिहीबार पोखराको मुस्ताङचोकमा आयोजना हुने विरोध कार्यक्रममा सहभागी हुन नागरिक समाज र राजनीतिक पार्टीसँग अनुरोध पनि गरेका छन् ।
सहकारी ठगी प्रकरण अनुसन्धानका लागि रास्वपा सभापति रवि लामिछानेलाई यही कात्तिक ३ गते काठमाडौँबाट पक्राउ गरी पोखरा ल्याएर उनीमाथि प्रहरीले अनुसन्धान गरिरहेको छ । लामिछाने पक्राउको विरोधमा रास्वपाले अहिले दिनहुँ पोखरामा सरकारविरुद्ध प्रदर्शन गरिरहेको छ ।
