काठमाडौं । श्रीलंकन नागरिकलाई युरोप पठाइदिने भन्दै नेपाल ल्याएर बन्धक बनाउने कार्यमा संलग्न चार पाकिस्तानी नागरिक पक्राउ परेका छन् ।
काठमाडौँ उपत्यका अपराध अनुसन्धान कार्यालयको टोलीले पाकिस्तानी नागरिकहरु जुबैर अजमद, शाहजहान तन्वीर, मलिक अब्दुल हमीद र आरिफ मसिहलाई पक्राउ गरेको हो ।
उनीहरुले श्रीलंकन नागरिकलाई युरोपका विभिन्न देश पठाइदिने भन्दै प्रलोभन देखाएर काठमाडौं ल्याई बन्धक बनाएर राखेको प्रहरीले जनाएको छ ।
अपराध अनुसन्धान कार्यालयका एसपी तथा प्रवक्ता नकुल पोखरेलले वैदेशिक रोजगारीमा क्यानडा, रोमानिया, ग्रिस पठाइदिने भन्दै श्रीलंकनलाई काठमाडौं ल्याइ बन्धन बनाउने, कुटपिट गर्ने धम्की दिने र रकम लुटपाट समेत गर्ने गरेको पाइएको जानकारी दिए ।
उनीहरुलाई अपहरण तथा शरीर बन्धकको कसुरमा अनुसन्धान तथा कारबाही गर्न भन्दै जिल्ला प्रहरी परिसर काठमाडौं पठाइएको छ ।
