काठमाडौँ । इण्डियन प्रिमियर लिग (आईपीएल)मा रोयल च्यालेञ्जर्स बेंग्लोरले लखनऊ सुपर जायन्ट्सलाई १८ रनले पराजित गरेको छ।
घरेलु मैदान ऐकना स्टेडियममा गए राति बेंग्लोरले दिएको १२७ रनको लक्ष्य पछ्याएको लखनऊले १९.५ ओभरमा अलआउट हुँदै १०८ रन मात्र बनायो। उसका लागि कृष्णपा गौथमले २३, अमित मिश्राले १९ तथा मार्कस स्टोईनेस र नभिन उल हकले समान १३/१३ रन जोडे।
बेंग्लोरका लागि जोस हेजलवुड र कर्ण शर्माले २–२ तथा मोहम्मद सिराज, ग्लेन म्याक्सवेल र वानिंदु हसरंगाले १–१ विकेट लिए। त्यसअघि टस जितेर पहिले ब्याटिङ गरेको बेंग्लोरले निर्धारित २० ओभरमा ९ विकेट गुमाएर १२६ रन बनायो।
बेंग्लोरका लागि कप्तान फाफ डु प्लेसिसले ४४, विराट कोहलीले ३१ रन र दिनेश कार्तिकले १६ रन बनाउँदा अरु ब्याटरले दोहोरो अंकमा रन जोड्न सकेनन्।
दुबै टोलीले ९ खेलमा पाँच जित र चार हार व्यहोरेका छन् तर बेंग्लोर लिगको पाँचौँ स्थानमा छ भने लखनऊ तेस्रो स्थानमा छ।
